Р.Доржзовд: Хүүхэд хичээлдээ дуртай байх албагүй, харин хийх ёстойгоо хийж хэвших нь чухал

Blesson.mn сайтаас “Багшаас асууя” булангийн энэ удаагийн дугаарт Орхон аймгийн Эрдмийн сан сургуулийн математикийн багш Р.Доржзовдоос аав ээж, асран хамгаалагчдад зориулан хүүхэд сурахад тулгардаг бэрхшээл болон анхаарах зүйлсийн талаар тодрууллаа.

Хүүхдийг бага ангиас нь эхлэн хичээл, гэрийн даалгаврыг нь хийлгэж хэвшүүлэх нь яагаад чухал байдаг вэ?

-Өнөөдөр өгч байгаа багахан даалгаврыг хийхгүй яваад байвал цаашдаа хэн ч ямар ч ажил даалгасан хийдэггүй, найдваргүй хүн болж төлөвшинө. Тиймээс хүүхдийг аль болох багаас нь буюу бага ангиас нь эхлэн даалгавар хийлгэж хэвшүүлэх нь нэн чухал юм. Эхэндээ хэцүү санагдаж болох ч хийгээд хэвшчихээр хэвийн л зүйл болно. Тэр хэрээр ачаалал даах чадвар болон бусад чадваруудыг эзэмшихэд бэлтгэгдэж байдаг.

Хүүхдэд бага, дунд ангид нь зөв дадал суулгахгүй бол цаашид ямар сөрөг үр дагавар гарах вэ?

-Бага, дунд ангид нь сурагчид сайн шаардлага тавьж, хичээлдээ түүртэхгүй болтол нь зөв дадал суулгах ёстой. Тэгэхгүй аргалж, тойрч зугтаалгаад байвал бүх зүйлийг аргалах гэж боддог болно. Дадал суугаагүй хүүхэд юманд төвлөрөхөд хэцүү байдаг. Энэ байдал нь ахлах ангид төдийгүй Их сургуульд ороход нь хүртэл сөргөөр нөлөөлдөг. Мөн хүүхэд том болох тусам багш болон эцэг эхийн шаардлагыг хүлээж авах нь багасдаг тул шилжилтийн наснаас нь өмнө зөв дадлыг хэвшүүлэхгүй бол том болох тусам улам хэцүү болно.

Хүүхдийг сургаж төлөвшүүлэхэд эцэг эхчүүдийн анхаарах зүйл болон гаргадаг нийтлэг алдаа юу вэ?

-Аав ээжүүд сургууль болон багштай ижил шаардлага тавих ёстой. Багш даалгавар өгөхөд эцэг эхчүүд “Яасан их юм бэ, хүүхэд амрахгүй байна” гэх мэтээр хүүхдийн өмнөөс хандахаар хүүхэд аль зөөлөн тал руугаа налаад, шаардлага тавьж байгаа талыг хатуу, муу гэсэн буруу ойлголт авчихдаг. Энэ нь даамжирвал сүүлдээ багшийг буруутгаж, муу багш гэхэд хүргэдэг.

Хичээлдээ дургүй эсвэл даалгавраас цааргалдаг хүүхдэд хэрхэн хандаж, хариуцлагатай хүн болгон төлөвшүүлэх вэ?

 -Хүүхэд заавал хичээлдээ дуртай байх албагүй. Дургүй байсан ч даалгавар хийх ёстой гэдгийг л ойлгуулах нь чухал юм. Хийх шаардлагатай зүйлээ заавал хийж сурвал хариуцлага үүрэх чадвар сууж, том хүн болно. Манайд бүх юмыг аргалж, зугтаж, амархан аргыг эрж хайн түр зуур болгосоор насанд хүрсэн ч том болоогүй хүн маш олон байдаг. Хүүхэд зөвхөн дуртай зүйлдээ цаг зарцуулахаас гадна заавал хийх шаардлагатай зүйлээ хийж хэвших нь хариуцлагатай хүн болж төлөвшихөд чухал нөлөөтэй.

Ц.Баасансүрэн