Дөрвөн эцэг эх, асран хамгаалагч тутмын нэг нь хүүхдэд шинэ зүйлийн нэршлийг хэлж өгдөггүй, хүүхдээ магтан урамшуулдаггүй

Өнөөдрийн тоо бол 26 хувь. Энэ хувь бол бага насны хүүхдэд шинэ зүйлийн нэршлийг огт хэлж өгөөгүй, хүүхдээ магтан урамшуулаагүй эцэг эх, асран хамгаалагчийн хувь. Гэтэл бага насны хүүхэд орчноо бусдын дэмжлэг туслалцаатайгаар танин мэдэх замаар хөгжиж байдаг.

НҮБ-ын Хүүхдийн сангаас “Бага насны хүүхэдтэй эцэг эх, асран хамгаалагчдын хариу үйлдэлт асаргаа халамж” судалгааг 2023 онд хийж 2024 онд танилцуулсан. Тус судалгаанд эцэг эх асран хамгаалагчид анхаарууштай олон тоо баримт дурдагдсан. Бага насны хүүхэдтэй эцэг эх, асран хамгаалагчийн хариу үйлдэлт асаргаа халамж хэр байгааг энэ судалгаагаар гаргаж ирсэн юм.

Эцэг эх, асран хамгаалагчийн зүгээс хүүхэдтэй харилцах явцдаа хүүхдийн мэдэхгүй шинэ эд зүйлс тааралдахад тухайн зүйлийн нэршлийг хэлж өгөх, давтан хэлэх нь хүүхдэд анхаарлаа хандуулахаас гадна танин мэдэхүй, нийгэмшлийн хөгжлийг дэмжиж буйг илэрхийлдэг аж. Гэвч судалгаанд оролцогчдын 24 хувь нь ажиглалтын явцад хүүхдэд өгсөн тоглоомд дурдагдаж буй эд зүйлсийн нэршлийг хэлж өгөөгүй байна. Мөн 26 хувь нь хүүхэдтэй тоглох явцдаа хүүхдийг урамшуулан дэмжсэн магтаалын үг хэллэгийг огт хэлээгүй байна. Эндээс үзэхэд манай улсын бага насны хүүхэдтэй эцэг эх, асран хамгаалагчид хүүхдэдээ эерэг, найрсаг хандлагатай байх нь (энэ нь зарим талаар эрхлүүлэх өнгө аястай) нийтлэг боловч хүүхдэдээ шинэ зүйл зааж сургах тал дээр учир дутагдалтай байгааг судалгааны үр дүнгээр харуулжээ.

Дөрвөн эцэг эх, асран хамгаалагч тутмын нэг нь ажиглалтын явцад хүүхдэд шинэ зүйлийн нэршлийг хэлж өгөөгүй, хүүхдээ магтан урамшуулаагүй нь эцэг эх, асран хамгаалагчдын дунд бага насны хүүхдэд чиглэсэн хариу үйлдэлт асаргаа халамж хангалтгүй байгааг илэрхийлэх үзүүлэлт юм. Гэтэл бага насны хүүхдэд эцэг эх, асран хамгаалагчийн зүгээс үзүүлэх асаргаа халамж нь хариу үйлдэлт (респонсив) буюу хүүхдийн хэрэгцээг илэрхийлэх дохио зангаа, үйл хөдлөл, үг яриа, асуулт зэрэгт анхааралтай байж тохирсон асаргаа, дэмжлэгийг үзүүлж чадаж буй эсэх нь чухал байдгийг хүүхдийн байгууллагаас мэдээлсэн.

Сонирхуулахад, судалгаанд оролцогчдын 58.1 хувь нь Улаанбаатар хот, 41.9 хувь нь хөдөө орон нутгийнх байсан бөгөөд судалгаанд хамрагдсан бага насны хүүхэдтэй эцэг эх, асран хамгаалагчдын 84.6 хувь нь эмэгтэй, насны бүлгийн хувьд ихэнх нь 25-39 насны иргэд байсан аж. Боловсролын түвшний хувьд 58.6 хувь нь дээд боловсролтой, 33.9 хувь нь бүрэн дунд боловсролтой байжээ.

Эх сурвалж: НҮБ-ын Хүүхдийн сан, “Бага насны хүүхэдтэй эцэг эх, асран хамгаалагчдын хариу үйлдэлт асаргаа халамж” судалгаа 2023